Eguzkik antolatuta igandean Gladys del Estal hil zuteneko 38. urtemugaren oroitze-ekitaldia

Eguzkik (Euskal Herriko talde ekologista eta antinuklearra) Gladys del Estal donostiarra oroitzeko ekitaldia antolatu du igande honetarako (ekainak 4).  38 urte pasa dira Gladys hil zutenetik, buruan tiro bat emanda.

Heriotza

1979ko ekainaren 3an, Energia Nuklearraren Aurkako Nazioarteko Egunean, José Martínez Salas guardia zibilak Gladys bertatik bertara tiro eginda erail zuen, Nafarroa Garaiko Tutera hirian. Bardeetako tiro eremuaren aurka, energia nuklearraren aurka eta Lemoizko zentral nuklearraren eraikuntza geldiaraztearren eginiko ekitaldian parte hartzen ari zen Gladys. Lekukoek diotenez, José Martínez Salasek «tía buena» (euskaraz, neska katxarroa) esan zion Gladysi, Gladysek «hijo de puta» (euskaraz, putakume) ihardetsi eta orduan Martínez Salasek bere armaren kulatarekin jo zuen; Gladys lurrera erori zen, eta, altxatzen ari zela, Martínez Salasek tiro egin zion buruan. Tiroa garondotik sartu eta sudurretik atera zitzaion. Gladys ospitalera eraman zuten, larri zaurituta, eta laster hil zen. (Informazio iturria: wikipedia)

Oroimena

Gaur egun, Gladys del Estal Euskal Herriko mugimendu antinuklearraren sinbolo da. Egiako hainbat herritar taldek Kristinaenea parkeari Gladysenea izena jartzeko eskakizuna egin zuten urtetan, baina Donostiako Udaletik beti ezezko erantzuna jaso zuten. Ezezko horren aurrean, sektore horien aldetik izena zabaldu zuten euren kabuz eta parkeko sarreran izena aldatu ere egin zen. Horren ondorioz, urtetan zehar herritar askoren artean Gladysenea deitu izan zaio parkeari. Azkenean, Donostiako Udalak Kristinaenean oinezkoentzat eraikitako sarbide garai bati Gladys del Estal pasabidea izena jarri zion 2009. urtean.

2016ko ekainaren 5ean egin zen oroitze-ekitaldia

Parkeko gainaldean, Gladysen omenezko hilarri bat dago. Urtero, Gladysen heriotzaren urteurrenean, oroitzapen ekitaldi bat burutzen da hilarriaren aurrean Eguzki elkartearen eskutik. 2009 urtean, ekitaldi horren baitan mugimendu antinuklearrari buruzko erakusketa fotografiko bat ere antolatu zen Egian eta Donostiako Alde Zaharrean Gladysen heriotzaren 30. urteurrenean. Tuteran ere, tiroz zauritu zuten lekuan, monolito bat dago haren omenez.

Arg.: Eguzki

Eguzki mugimenduak antolatu duen oroitze-ekitaldi eguerdiko 12:00etan hasiko da, Gladysen oroitarriaren aurrean edo ezkiaren gerizpean, Donostiako Egia auzoan: “Parte-hartzaileok Gladys Eneko atean bilduko gara eta erromerian joango gara parkeko goiko ordekaraino, Gladysen oroitarria dagoen lekuraino, alegia. Han egingo da ekitaldia, lore eta kanta tartean. Bertan, aktualitatearen irakurketa bat ere egingo da, ohi bezala. Izan ere, Eguzkitik behin baino gehiagotan nabarmendu dugunez, guk Gladys oroitzen dugu gure laguna zelako eta zigorrik gabe geratu zen bidegabekeria hura ahazterik ez dugulako, baina baita ere Gladys zorigaiztoko egun hartan Tuterara eraman zuten arrazoiak bizirik daudelako gaur egungo borroka ekologistetan”.

EGUZKI

Gladys eta “Estatuaren gehiegikerien” Biktimak Aitortzeko Legea

“Eta zertaz hitz egingo dugu? Bada, Konstituzio Auzitegiak aste honetan bertan suspenditu egin duela kontuan izanda, seguruena Estatuaren “gehiegikeriak” 1978 eta 1999 bitartean eragindako Biktimak Aitortzeko Legeaz hitz egiten hasiko gara. Gogoan izan Eusko Jaurlaritzak lege hori iaz abiatu zuela, hain justu, fetxa hauetan. Bakegintzako eta Bizikidetzako idazkari nagusi Jonan Fernandezek berak esan zuenearen arabera, lege horren bidez Gladys izan zitekeen orain arte ukatutako aitortza jaso zezaketen biktimetako bat. Horrela bada, primeran, esan genuen orduan, baina eszeptikoak izatea beste erremediorik ez genuela ere gehitu genuen, uste baikenuen aitortzak, kasurik onenean, luze joko zuela. Gobernu espainolak orain dela pare bat aste lege horren kontra jarri duen helegitea, guztiz arbuiatzen duguna, eta horren ondorioz Kontituzio Auzitegiak aste honetan bertan hartu duen erabakia gure eszeptizismoa ondo justifikatuta zegoela berrestera datoz. Garbi dago gai hau ez dela sartu PPren eta EAJren arteko tratuan”. 

Lemoizen etorkizuna

“Bada, berriz, PPren eta EAJren arteko tratuan sartu den eta igandean Gladysen omenaldian hizpide izango dugun kontu bat. Izan ere, tratu horren arabera Lemoizko zentralak okupatzen dituen lursailak “berehala euskal erakundeen esku” geratuko dira. Hainbeste urte pasa eta gero EAJk gai hau horrelako akordio batean sartu izanak Eusko Jaurlarritzak buruan proiektu zehatzen bat baduela aditzera ematen du. Are gehiago, zenbait komunikabidek dagoeneko aipatu dute Basordan akuikultura-proiektu bat eta Bimep kokatzeko aukera (energia elektrikoa sortzeko olatuen indarraz baliatzen den plataforma da Bimep). Gauzak horrela, Eguzkik honako hau esan behar du: Lemoizko zentral nuklearrak okupatzen dituen lursailei “historiarekin bat datorren erabilera” eman behar zaie. Eta horrek, zehatz-mehatz, zer esan nahi du? Bada, gure iritziz, Basordako kala naturaren aldetik ahal den neurrian lehengoratu beharko litzatekeela eta bertan parke publiko bat eratu, beharbada memoria-leku gisa. Eguzkik ez du beste erabilerarik baztertzen, baina betiere lehengoratzearekin eta erabilera publikoarekin bateragarri den heinean. Nolanahi ere, lursail horiei ematen zaien erabilera edozein dela, taldeak aholkatzen du erabakia aldebakarrekoa ez baizik eta ahal den adostasun sozialik zabalenaren ondorio izatea, memoriak horretarako ere balio beharko luke eta. Inork gure arrazonamenduaren berri nahi badu, jo beza honako lotura honetara:   http://eguzki.org/2017/05/19/eguzkik-lemoizen-eskatzen-du-historiarekin-bat-datorren-erabilera/

Adi Garoñari!

“Eta igandean Garoñari buruz ere hitz egingo dugu, jakina. Ibredrolak berak esan du ez duela zentrala berriz martxan jartzeko asmorik. Baina adi! Ez da begi-bistatik galdu behar Gobernu espainolak gaiarekin bueltaka jarraitzen duela eta Iberdrolaren adierazpen hori Garoñako zentrala truke-txanpona den negoziazio-testuinguru batean ulertu behar dela. Horrelako zerbait: “Zentrala berriz ere martxan jar dezadan nahi baduzu, zergak murriztu behar dizkidazu, edo bestela segurtasuna bermatzeko eskatzen dizkidazun inbertsioak apaldu; edo zentrala behin betiko ixten badut, beste zentral batzuen esplotazio-epea luzatzen utzi behar didazu”. Gainera, bada adi jarraitzeko beste arrazoi bat, izan ere, zentrala itxi ondoren, eraitsi ordez, hondakin erradioaktiboen biltegi bihurtzeko aukera aipatzen hasi dira. Beraz, adi egon ezean, Garoñako atea itxi bai baina arrisku nuklearra leihotik sartzen jarraitzeko aukera dugu. Adi Garoñari!”

Utzi erantzun bat

Please log in using one of these methods to post your comment:

WordPress.com Logo

You are commenting using your WordPress.com account. Log Out / Aldatu )

Twitter picture

You are commenting using your Twitter account. Log Out / Aldatu )

Facebook photo

You are commenting using your Facebook account. Log Out / Aldatu )

Google+ photo

You are commenting using your Google+ account. Log Out / Aldatu )

Connecting to %s